早係八月碧桂園債務危機爆發，金融界已經傳出唔少富豪、富二代及家族基金中伏；最近碧桂園的星級債主終於要現身追債，就係建滔集團（148），早前公司已將債轉股，近排直接出手向碧桂園追債$16億，建滔主席張國榮今鋪真是老貓燒鬚。
見張國榮也中招，有一同樣坐住碧桂園債的家族基金負責人向友人說：「嗰陣時無辦法，焗住要買高息內房債，如果唔係個盤無Yield，交唔到成績㗎！」
又係息字頭上一把刀，廠佬出身的建滔老闆張國榮，曾經好威猛㗎！旗下建滔積層板（1888）曾獲大劉作基礎投資者，只是上市後股價未如理想，公司被謔稱為「建滔即沉板」，股價到2017年卒之返到家鄉。同年，張國榮亦聲名大噪，趁國泰（293）業績不濟，又裁員又被剔出MSCI，在低位掃入國泰成為第三大股東。當年廠佬出身的亦為投資界挖目相看，而此建滔張國榮的私人秘書英文名是Monica ，為銀行界人士津津樂道，謂先要接通Monica先可找到張國榮，而熱衷認識演藝界人士的張國榮，也邀得唱《龍的傳人》、《我是中國人》的愛國歌手張明敏擔任公司非執董，夠哂星光燿燿。
建滔持有國泰不足一年，2017年底就一炮過掟貨俾卡塔爾航空，淨賺$8億。
此後，張國榮在銀行界四出招兵買馬搶人材，成立自家投資團隊；可能食過國泰（293）翻尋味，加上建滔現金多，就自行做投資。
無獨有偶，2017年國泰航空被剔出恒指成份股後，就由碧桂園（2007）補上，今天來看，國泰走出疫情陰霾，並準備贖回政府的優先股，碧桂園的債務仍深不見底，張國榮可能哼一句：「誰能代替你地位。」更應景。
