FI專欄|好食過恒香、榮華及大同的小店老婆餅|Louise

Feature

871

經濟蕭條已是不爭的事實,而「一舖養三代」這個如意算盤,現時未必敲得響。家住元朗區,眼見市旺時被逼遷的又新街「B仔涼粉」大舖,這幾年不斷轉換租客;有做西餐廳賣Pizza的、有做中式點心及川茶館賣酸菜魚等,但都做唔住,又再成為吉鋪。喺呢啲環境下,反而一些小店在狹逢中成長。

半年前行過一家在Yoho Mall附近的小食店,門口用熒光紙寫上「老婆餅出爐」,心想:「咁細間小食店有新鮮熱辣老婆餅?咩料?」即踩入去買一件試食,見老闆娘從焗爐夾一件出來,熱辣辣的盛惠$10,真係好好食,我夠膽講好食過「恒香」、「榮華」、及「大同」呢啲老餅家!

老婆餅的味道不太甜,關鍵係個饀有真「冬瓜茸」,嘴嚼時偶有冬瓜肉的質感,過口癮一流!而一看老闆就知道她是「外行人」了, 這家小食館名為「龍眼樹」,由兩姐弟一起打拼。細佬原本在布廠打工30年,近年經濟不景下遭到裁員,而家姐以往在診所工作,一把聲線很有「姑娘」的韻味。她說自己很鍾情做西餅蛋糕,昔日不斷鑽研並經常送朋友及同事分享。於是拉着細佬膽粗粗開小食店。而她這件老婆餅是有獨門秘方的,其妹移民荷蘭也有在當地賣此手造老婆餅。

兩姊弟在小食店工作時,經常面露笑容。

此小店見證著香港經濟走下坡,香港人自強不息的揾食精神,然而「龍眼樹」賣的除了是老婆餅、魚蛋、腸粉、砵仔糕及狗仔粉外;還賣一份人情味。兩姊弟在「龍眼樹」下經常笑容可掬,放學時段有幼稚園、中小學生到來篤魚蛋腸粉燒賣;都是他們的comfort food。見過老闆娘曾經心血來潮,用法國靚牛油做了一袋袋的小蛋糕,送小朋友吃;見住小朋友開心,老闆娘又露出滿足的笑容。雖然小蛋糕受歡迎,但他倆決意不作零售,事關鄰舖有另一蛋糕小店,亦有同款小蛋糕出售,老闆娘為免誤會以為搶生意寧願不賣,小店經營之道與大財團的「大小通吃」實在有天淵之別,務求大家都有生意做有啖飯食。也許幫襯「龍眼樹」就是喜歡佢沒有「生意佬」的味道,仿如探望友人閑話家常般。即使買一件老婆餅咬下,仍多謝前多謝後。

就是這一小袋蛋糕仔,逗得小孩常來幫襯「篤魚蛋」。

週末的時候,又見他們的細妺在鋪頭幫手,自開張以來,兩姐弟都沒休息,家姐說:「我呢個妹真係好好,佢自己有份工,但一有時間就過來幫手。」從他們三姊弟身上,又感受到一份姊弟親情。小妹經常關心「龍眼樹」的營運狀况,怕有天吃不到老婆餅,據知租金乃是一大壓力,小小店舖月租仍要$3萬多,目前倆姊弟幸好賺到一份人工,2023年快將過去,但願香港人都可以好似龍眼樹兩姊弟,靠自己的一雙手,搵到啖安樂茶飯,預祝新年進步。

Subscribe FORTUNE INSIGHT Telegram: 
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen

FOLLOW US