【FI專訪】由「28座大王」到導演，拍出第一部被Netflix看中、全球同步播放的香港劇集。

「大王」宋本中，最人所共知的身份可能是99年香港電影《三五成群》中的燒屍案主腦「廿八座大王」一角，如今，當年的「古惑仔」稚氣已脫，蛻變成主力幕後的「宋導」。宋本中2002開始退居幕後執導，並於2006年開辦影視兄弟製作公司，並執導《反黑》，該劇於17年播出後好評如潮，甚至被評為「近年難得一見有驚喜的本土警匪劇」。

星爺啟蒙演員夢

宋本中自言由細已經在片場長大，10歲半做童星「騎呢啡」（閒角）角色，10歲一次巧遇周星馳經歷令他尤其深刻，對「電影」埋下了興趣的種子：「嗰時聽到人話喺麥花臣有得見周星馳，拍《新精武門》，見到啲人排隊上巴士去，我就等架車一郁就爬上去，隻手緊緊握住紙筆，務必要攞到周星馳簽名。」去到了後被臨時安排做「臨記」，等了3、4小時，又被煙霧特效「燻足」全程，才等到放飯時候見到星爺，順利拿到簽名，更出了人生第一份糧，買到禮物送給爺爺嫲嫲。宋本中說，自己是中法混血兒，媽媽是法國人，但他自幼是爺爺嫲嫲扶養大的，所以他也覺得「非常感恩」，更言「多謝周星馳」。

鍾意這一行，因為每次都不一樣

10歲幼齡入行，宋本中開始在不同作品出現，如《Beyond日記之莫欺少年窮》、《四大家族之龍虎兄弟》，當然還有99年的《三五成群》，宋本中似乎飾演反派、奸角為主。被問到「覺得做咩角色最好玩？」「做咩都好玩，點解我會鐘意呢一行，因為佢每次都唔一樣。就算你再翻拍都唔一樣。」

「94年拍《新邊緣人》嘅時候好難忘，講成班人劈友，我地200幾人係尖沙咀加拿分道，匿埋喺啲後巷度，一action就衝出黎。當時要申請什麼許可根本冇可能，因為老闆由比錢去到拍完都不過3個月，但申請要4個月。所以當時好enjoy那種『偷拍』嘅感覺。」

幕前好玩，但一直心在幕後

宋本中雖然出演過不少電影、電視劇，但星途不能算是「一分耕耘，一分收穫」，也不算是「大紅大紫」，但這並非宋本中轉戰幕後的原因。「我其實一直鍾意做幕後。我人生第一個見嘅導演係王家衛，《旺角卡門》，當時覺得好有型，又高，戴住副超，成百幾人跟住，連張學友、劉德華都要聽佢講，覺得好猛料。」當時這一幕植入到宋本中腦海，又感於演戲多是「打打殺殺」的角色，所以想有另類挑戰。此外，宋本中還笑著感嘆「每次去女朋友屋企食飯見家長，都比人話『咦你咪燒屍嗰個，大王吖嘛』，然後面色一變，生果都急急腳收埋。」

於是就順理成章，由幕前轉到幕後，由演員到導演、影視製作人。2006年，宋本中與拍檔陳國坤在土瓜灣某工廈租了一單位，並成立了「影視兄弟製作公司」。對於轉型，宋本中形容是「天意」，「慢慢一路走來，可能會有人覺得我變左。感覺好似以前揸艇仔，但無啦啦而家比隻Titanic我揸，望住個海，個個望住我背脊，孤獨嘅背影，實覺得我變左。」領導的角色，有苦有甜，但做幕後，做到那個「好高好型戴黑超，背後跟住百幾人」的背影，一直是宋本中的夢想。

另一里程碑：《反黑》

宋本中執導的作品有電影，有劇集，要說在香港成績最好的，非《反黑》莫屬。《反黑》（OCTB）是影視兄弟有限公司製作，全劇30集，以97年回歸前的江湖作故事背景，由陳小春、陳國坤等人主演，宋本中自己亦有客串麻雀館負責人「太子雞」一角。《反黑》成功在什麼地方？該劇衝出國際，成為首部香港兼粵語劇集登陸Netflix，不單止，全4K製作的《反黑》每日零時零分，在YouTube全球同步播放，是為「香港第一」。「而家各大電視台、網台搞咁多野，都係想改變人睇電視嘅模式，我地做到第一次全球同步播放，單計香港，已經有30萬個裝置同時收睇，呢個號召力係非一般。去到第6、7集，我地已經比Netflix睇中左。」Netflix本來想立即買《反黑》，所以要求《反黑》馬上從YouTube下架，唯宋本中想力保香港本土的固有支持者，故堅持把《反黑》全部播完才放上Netflix。