政府大舉發展「北都」開墾新界土地，無人夠膽怠慢。昔日新界鄉紳土豪以至社團人士，因為土地利益，爆頭浴血事件多不勝數，「竊聽風雲3」之土豪爭霸都有得你睇。香港由治及興之下，類似場面已不復再。
早已上岸的勝和「太上皇」囝囝，此猛人過去幾十年可謂食住土地呢條肥仔水，替發展商在新界收地揾落唔少，身家以億元計。出身元朗屏山唐人新村的他，早年到荷蘭揾食，曾是新世界(17)的御用收地專家，但食腦嘅佢懂得低調，以往從來沒有曝光。但十幾年前出席了流浮山「小桃園飯局」後而爆紅，不時被媒體追踪拍照。
但時而世易，昔日囝囝跟兄弟去逍遣的元朗「銀湖芬蘭浴」亦已變成老人院。囝囝與新世界關係密切，其自住居所亦為旗下元朗屋苑。在新田一帶新世界有數以百萬呎農地，都是八、九十年代收購返來的，有些是倉地，以往收租都幾和味，但正所謂蠻荒之地，斯文人唔係咁容易收到租㗎，聽講都係透過囝囝幫手做包租公，話哂個朵咁響有咩要排難解紛辦唔到呢？
但新世界（17）呢幾年債台高築，聽新田的鄉紳透露公司的管理層最近決定，唔再由囝囝幫手而係直接向倉地租戶收租，每月近千萬元。咁就慳番囝囝中間的「行政管理服務費」。新世界懂得有效檢視資源增加收入，相信銀行及債權人必感到欣喜。
以往發展新界土地時，發展商都遇到唔少棘手問題，務必要「拜土地」隴絡鄉紳，因此囝囝甚有市場價值，佢以往都搞過一個「城鄉共和協會」，旨在發展過程中如何改善居民生活咁話；不過現時政府一鎚定音之下，北部都會區快馬加鞭，囝囝在發展商中的角色有變，難再起風雲了。
註：專欄內作者言論純屬個人意見，並不代表本網立場
