陳南祿的秘密武器|葉朗程

專欄

972

收爐前倒數,借陳南祿先生做個序幕。

聽聞過陳南祿是誰的人,最深刻印象一定不是他做過馬會主席或者恒隆 CEO,而是國泰掌舵人。基本上你在報章上看見他的樣子,也好像隱約有個國泰標志在他臉上似的。

實在有太多朋友跟陳生共事過,所以有關他的事蹟,總會有所聽聞,有些早已是公開秘密,例如有人犯了錯,他會皮笑肉不笑說,「不如你喺度跳落去。」

討厭他的人說他變態苛刻,尊敬他的人說他嚴謹認真,但就算是說他負面的人,也情難自禁一句,「冇陳南祿,邊有國泰。」

不是要在這裏為陳生寫篇小傳記,只是來到收爐一天,不想用犯太歲的美斯作爲兔年總結,而回顧過去一年的香港,我實在不由想起陳南祿先生的一件秘密武器。所謂武器,並不是比喻,而是真真正正一件他每次跟同事開會都會暗藏自己西裝裏袋的東西,一到適當時候,他便會拿出來。

我跟三位跟陳生共事過的員工求證了,這武器千真萬確,三位當中有兩位都中過招,而這件武器就是應該記入國泰歷史的「不知所謂印」。

顧名思義,不知所謂印就是一個圖章,圖章上刻有的不是陳生的名字,而是「不知所謂」四個大字。無論呈上的是 budget forecast、marketing proposal,還是一份講辭的初稿,陳生都會小小心心的看,遇上極不合意的就會一鎚定印。

經過一段時間,同事已經聞印喪膽,所以有些人已經鍛煉出敏捷身手,在陳生落印之前會馬上抽起文件,但可是再快也不及老細快,那個印還是落得狠而準。試過有同事乾脆不把文件抽起,直接用手蓋著,結果印在手背。

今天香港地,你眼望我眼,問得最多一句,「點解搞成咁」。這句「點解搞成咁」已經由當初本是帶點煽情的反問,變成今天至真至誠的詢問。
千瘡百孔要補,需要一個像陳南祿一樣的變態佬。

嚴謹認真那部份是力求完美,變態苛刻的那部分是做每件事都要有切膚的肉緊。但原來呢個世界好少陳南祿,而多數人都係好似星期三上 TVB 講股票嗰位財經人咁,好似姓郭。

佢同節目主持嘅對答簡直係好睇過星爺。

「點睇後市?」主持人。

財經人噏咗一個期限,我都唔記得,大概係:「睇月尾啦,新年後再開市頭兩日,結算日後。」

「即係點睇?」主持人有笑容冇情緒,明顯聽慣佢老噏。

「如果跌嘅可能跌少少,多嘅就唔好入市住。嗱,如果升呢,可能升少少又未必真係反彈,如果升好多,我諗都唔使我教大家。」

噏到咁,可能主持都睇唔過眼,開始收起笑容:「咁即係點睇?」

最精警就係呢句:「而家唔穩,升跌都有機會。」

你而家覺得好笑,但如果那位是你有份出糧的人,你㷫唔㷫?

阿爺現在也在掙扎求存,我作為愛國份子,當然希望可以看到自己人生生性性。你令佢擔心都唔緊要,唔好要佢冇面吖大哥。

僅願各位大哥幫幫手,新一年變態過陳南祿。

Subscribe FORTUNE INSIGHT Telegram: 
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen

FOLLOW US