這一個問題歷久常新，但要答得好不容易。如果你答得不好，分分鐘是全城討論焦點。好像GoGoVan就是一例，獲中資物流公司「58速運」睇中後就大談買樓哲學，買樓和創業又成為魚與熊掌之間的討論。
根據媒體的形容，GoGoVan的創辦人頗不屑，包括以下講法：「我做大事㗎嘛﹗」、「唔好再講買樓，係講創業，如果當初我為咗買樓今日就冇GoGoVan」等。香港太多相信買樓置富的人。呢類講法很衝擊他們的致富信仰。《禮記‧大學》原文有一句： 「有人此有土，有土此有財，有財此有用。」當然禮記不是膚淺地講買樓買地發達，而是有上文下理，但解古文有時好似解籤咁，大家都係主觀式直譯，然後再主觀奉成信仰。
更何況創業失敗率極高，創業家以自身成功去推掉另一個二元對立面，很難贏得大眾掌聲。雖然，我是幾同意這個講法，但不會選擇以豪氣、霸氣方式宣之於口。我常常寫文引以為戒，辛棄疾在最著名的《水龍吟.登建康賞心亭》中寫到：「求田問舍，怕應羞見，劉郎才氣！」就是說如果大丈夫只知道求田問舍，而不知救國救民，劉備會睇你唔起。這是講人生的志氣和理想，當然現在香港人無什麼救國救民的情操，但把情操換上對人生目標的追求，都岩用。
調返轉，這個星期《壹週刊》訪問樂隊Raidas成員黃耀光提了一句「別為層樓打一世工」，出奇地，反應又幾正面。或者咁講，當我地理解創業這個字眼時，視野會否有點狹窄？
創業不一定是指「做生意」，創業都可以係「創一番事業」，例如喜歡音樂、唱歌和表演，然後無限發揮自己的興趣。那麼人生活得無憾，有無一層樓又有咩所謂？我咁講係因為好羨慕那麼有夢想的人，我沒有，已經忘記了我的志願寫了什麼。我只有一些想做的事和因時際會想達到的理想，談不上是夢想。他們依然堅持，我覺得他們非常厲害。
每個人都有他的人生哲學，沒有誰比誰更高尚，也沒有誰對誰錯。上年內地中二生有篇文章瘋傳，我很喜歡有一句：「願你走出半生，歸來仍是少年。」
