回家後束起馬尾，幾縷髮絲沾在脖頸之間，過了一晚的妝容仍然豔麗，但蓋在氣得發紅的臉龐上，讓他霎時不敢跟她正眼對望。
「我沖涼先，」他當然知道她為什麼生氣，理虧的是自己，自不然想迅速逃離那雙緊緊盯著自己的眼睛。
「你好多錢咩？」她跟著他走到浴室，滿腔怒意洶湧難捺，「做乜要叫枝咁貴嘅酒？」
= = = = = = = = = = = = = = =
故事說到這裏，眾人不禁異口同聲問他：「你叫咗枝咩酒？」
「屌，你哋聽埋先啦，咩酒都唔係故事重點。」
「屌，」我搶著說，「你條女因為枝酒嬲到咁，咁都唔係故事重點？」
「咪係囉，」屋內眾人起哄，誓要知道答案，「講啦仆街。」
如果要我們聽他繼續訴苦，他知道自己並無選擇，於是走到廚房，把酒拿出來，放在我們的中央。
「Wholly shit，」是十四代。
「你去 Toritama 叫枝十四代？」其中一位朋友的臉上掠過一陣躁動不安，「多咗啦。」
說得很好，的確是多咗，但有時候又很難怪他。
回到故事的起點，是這樣的。
= = = = = = = = = = = = = = =
與女朋友兩週年紀念，Ronald 選擇到 Toritama 慶祝，也就是香港最有格調的串燒店之一。
傳聞這是曾俊華兒子曾雕龍有份投資的，本來在這個位置開的店都不是怎樣做得起，但 Toritama 由開業一天便客似雲來，慕名而來的名人更是不少，而這枝十四代的源起便是由一位名人開始。
大概晚上七點鐘去到餐廳，Ronald 與女友坐下的時候還未有察覺什麼異樣，因為 Toritama 全部的座位都是圍著廚師的高凳，人太多，總不會逐張臉孔端詳吧。
可是越坐 Ronald 就發覺越不對勁，因為他發覺周圍的食客好像經常向著他的方向投下目光，於是他便輕聲一問坐在他左邊的女友：「呢間餐廳啲人好奇怪……好似係咁望住我。」
敏察異常的女朋友沒有立刻回話，只是在電話裏按了幾下，之後 Ronald 便收到了她的短訊：「唔係望緊你，係望緊你右手邊。」呆頭呆腦的 Ronald 隨即望了過去，而坐在他右手邊的客人被這樣一瞧，也錯愕地點點頭。
原來那人是 Mirror，的老闆，的老闆。
由那刻開始，Ronald 變得渾身不自在，因為他總是覺得女友在跟老老闆眉來眼去似的。不忍不忍還需忍，直到老老闆跟餐廳經理要了一瓶酒，Ronald 終於忍無可忍。對，就是一瓶十四代。
女朋友見到那瓶酒，無聲地 wow 了一下，Ronald 實在不得不正式示威，然後便跟餐廳經理說：「我都要一枝。」經理當然開心得說不出話來，但女朋友便在這時候斜斜地飛來一個眼神，至於老老闆那時候到底在想什麼，當然不得而知，但應該都是暗地一笑，心裏浮起三個字：「ON 9 仔。」
就是因為這瓶十四代，兩人整頓飯都沒有再說過一句話，回到家才爆發。
「你好多錢咩？做乜要叫枝咁貴嘅酒？」
「佢可以叫枝咁貴嘅酒，」Ronald 把拿著的毛巾狠狠的扔在地上，「我就唔叫得？」
之後女友的一句命中要害，覆水難收：「人哋係邊位你係邊位呀？」
「係呀，我係咁好勝㗎喇，」他氣得背上的寒毛根根乍起，「點吖？」
女友看著這位原本打算沖涼而全身赤裸的男人，大概覺得他不再吸引，臨走前冷靜地拋下了一句警世真理：「你呢啲唔係好勝，係逞強。」
= = = = = = = = = = = = = = =
好勝未必是好事，但逞強肯定是壞事；好勝是一種有實力支撐的 competitiveness，逞強是完全沒有經過大腦的無謂反抗；寧願流血不止，都想砍贏人哋褲袋散紙，天下間最核突的事莫過於此。
如果你問我，呀葉生，你講到自己咁醒，咁如果你係 Ronald，你會點呀？
問得好，咁就要睇下我有幾在乎個女人。
在乎的話——我會當場扮唔舒服，然後馬上逃離現場，餐飯下次再食。
不在乎的話——我會立刻跟老老闆說：李生，條女你啱咪攞去囉，但可唔可以用你枝十四代交換？
懂得放手，擁有的一定更多。
原文刊於作者facebook
