認真諗落，香港算是很少人揸電單車的地方。人口稠密的東南亞城市，如台北、曼谷、新德里等等，街上的電單車與行人比例有時候會接近一比一，就連與我們隔個大海的澳門，也是周街綿羊。
其實電單車在香港，應該更受歡迎。首先是因為夠抵玩，十萬蚊只可以買到質素中等至偏下的中古汽車，但用來買電單車就已經可以入門名牌。最重要還是車位不用錢，突破了香港買車容易養車難的困局。抵玩之餘，電單車的靈活也可以應付車多而且擠逼的城市環境，如果真要比較的話，在鬧區裡電單車一定比私家車有用，起碼搵位泊車會快點。
香港電單車普及的阻力之一，是怕死。香港不是一個電單車城市，但肯定是一個害怕電單車的城市。每個電單車手由考到牌開始，都被講到已經踏上一條意外的不歸路。佬編當然知道電單車風險較高，但如果不是每日都要上高速飛幹線的話，騎著電單車在城市裡遊走，問題應該也不大。
另一個普遍的說法，是很多在香港擁有交通工具的人，並不是為了搵食，而是舒適和附帶的社會地位，所以強調效率，卻沒有太多光環的電單車，自然不合時宜。不過佬編覺得電單車難以在香港普及的最大原因，是因為港鐵太方便，令到電單車的高效未能被人看見。
既然揸出嚟又唔係快幾多，講出嚟又唔夠溝女，又容易死，電單車在香港註定比較收皮。唯一的安慰，就是可以肯定，撇除外賣車手以外，在香港揸得電單車的人，都是真心的enthusiast。
J.
