每一個組織或機構都有或大或小的擦鞋文化，所謂的物極必反，就是過份地「大」或過份地「小」都會有反效果。
太大的擦鞋文化會踢走有能之士，這個是 common sense。
一講到文化，一字咁淺，都係嗰句，是 from the top down 孕育出來的。
上面那位喜歡出風頭，下面那位要做的就簡單了，不斷煲大佢 ego，對外擦對內擦，天天放任胡亂擦。
不要誤會，這些愛出風頭的老闆不是不理公司業績，而是他的 ego 跟公司業績一樣重要。
所以做下屬，條數就好易計。擦鞋花多啲時間定做好公司業績花多啲時間？問嚟都多餘，基於捨難取易的大前提，擦鞋的人遠遠會比做實事的人多。咁係咪代表公司一定會冧？又未必，睇吓做實事嗰班人「實」到乜嘢級數囉啦。
但完全沒有「擦鞋」是不是又會帶來極高效的企業文化？可能係，不過只顧高效而忽略人性，那個工作環境也不是理想的工作環境。
有家投資銀行，得㗎喇，唔使講名，全世界都識。如果入到呢間銀行，就算天生個樣衰到世界盡頭都唔需要整容，因為攞住呢間銀行嘅卡片直情好似噴咗成枝神仙水喺塊面咁，柒頭瞬間逆轉。
這家銀行信奉的哲學好簡單，正如一位在六七十年代擔任這家銀行的高層所言，最緊要懂得 stay greedy for a long time。對，不只是 greedy，而是 greedy for a long time。不過不過不過，千千萬萬要記住，銀行家也是受過高等教育的人，明刀明槍 greedy 便是低層次了，所以那個貪念要隱藏，那個攻擊性要隱藏，那個目中無人都要隱藏。
曾經有位明日之星，厲害了，加入這家銀行只有兩年時間，已經 contribute 了他所任職部門的 20% revenue，風頭一時無兩。心紅了，便越界了，有次想繞過一位高層去 close 一個 deal，而那位高層更是協助明日之星當年成功進入這家銀行的主要人物。
結果是非常直接的：明日之星被開除了，開除他的也不是那位「被得罪」的高層，而是其他高層的一致決定。比起貪念，他們更在乎尊重。
以上故事的道理就是，擦鞋其實就是識做，而「識做」不一定是「主動去做」，更多情況是「專登唔做」。得罪人一次，之後擦一萬次都補唔番。
但要說到最終極挑戰，便是有些不做不做還需做但做了又有可能得罪老細的情況。
香港有很多私人會所，有啲好容易入會，有啲有錢就入到會，有啲要有錢仲要有面先入到會。其中一間會所由一個大家族創立，會所成立至今最少四十年，而這個大家族就是出名低調而且家族裏頭人才濟濟。
早前疫情措施還未完全解除的時候，我見識到一次有質素的老細和有質素的員工之間的精彩互動。
會所裏的 coffee shop 每逢週末都有 lunch buffet，因為疫情關係，每次出去攞嘢食都需要戴口罩。那天其中一位家族成員也是 coffee shop 內其中一位客人，佢出去攞嘢食嗰陣唔記得戴口罩。
老細在自己的地頭橫行無忌不是完全說不過去，而作為員工不敢出聲又是情有可原，但竟然一位名牌上寫著 Leo 的經理，可以一臉不亢不卑地走過去，然後禮貌地對這位老細說一句：「唔好意思郭生，攞嘢食要戴口罩。」
值得表揚的不只是 Leo 經理的率直，而是老細之後的反應。他滿面歉意，連聲 sorry，回去戴回口罩後再走過去 Leo 身旁，輕輕拍了他的肩膀一下，眼神極為 appreciative，說了一句 thank you。
有個咁嘅老細，做員工有乜辦法唔感恩；有個咁嘅員工，做老細嘅又點會唔感激。
擦鞋是我這種世界仔的強項，強到有機會問鼎諾貝爾獎，但我其實最怕就是愛被擦的老細，因為根據經驗，渴求被奉承的，胸襟都很窄。
= = = = = = = = = = = = = = =
口水太多，不能用文字盡錄，而有些口水也不適合在一個完全公開的平台分享，所以這一年都在摸索 podcast 的可能性。搜集素材不費吹灰之力，反而如何分門別類才是學問。最近開始有點眉目，這個 podcast 頻道暫定叫做 OH M.Y POD。係，M.Y 即是 Marcus Yip，希望今年九月十五號左右可以在 F.I Prime 這個收費平台開始。#OhMYPod
註：專欄作者的觀點不代表本網立場。
*標題為編輯所擬
**原文刊於作者facebook
