新一年大劉劉鑾雄激活了沉寂的新聞界，在「皇室堡事件」澄清記者會上大訴冤屈。不愧為一代股壇狙擊手，精準有層次地連環掃射「白鞋蕭-蕭炎坤」、「蕭若元」、再揪出蕭若元昔日的上市公司易還財務、變靚D等，再直搗傳聞為呂麗君蝕錢軍師的劉鎮鴻（Jeff Lau）。大劉腦思辨敏捷、說話夠哂啜核，為唔少「聽得懂」他説話的人帶來歡樂，有位金融界人士睇到大劉新聞後說：「香港真係唔可以冇咗大劉㗎！點解無財經記者呢？」
超級富豪有外母照
記者會上大劉不經意地提到自己的發跡史：「由借我外母十五萬轆到今日咁……..」 令好多白手興家捱過苦嘅濶佬聽後愈「㗳」愈有味。話說大劉與已故前妻寶詠琴創業初期，得到外母鍾全英支持，將自住嘅筲箕灣樂群大廈多次抵押，科水給他們搞風扇廠。祖籍潮洲的李嘉誠，五十年代創辦塑膠廠初期，同樣得到外母邱碧雲借出五萬元創業。但誠哥唔似得大劉般坦蕩蕩，從未公開透露外母在他創業路上的助力，有次接受外媒訪問時，只隱晦地交待向親戚借來數萬元創業。
高賣低買 見獵心起
誠哥與大劉，早年也惺惺相識。大劉的愛美高1983年上市時，寶詠琴找到誠哥作為基礎投資者，令到愛美高生色不少。只不過後來大劉變身為股壇狙擊手後，雙方就行得遠了，大劉反而與彤叔更為投契。
財金界人士認為大劉沉靜多時，今次開記者會又怎會是娛樂大眾，必然有後著。無獨有偶，本週三傳出位於灣仔的恒大中心交易第三度流標。2015年大劉以$150億天價把這幢原稱「愛美高大厦」嘅地標售予恒大，交易早已留有伏線，除了是分期付款之外，大劉亦有優先權回購這幢物業，分分鐘可以低價「完璧歸趙」，如獵鷹見獵物般，睇準便出擊。
私有化顯狙擊手本色
大劉高賣低買「翻啅」資產早有前科。1983年愛美高上市半年內，股價由兩蚊炒高上四蚊，85年大劉將手頭兩成愛美高股份以每股$1.54賣予一個基金套現$1億，連董事都辭任埋，由佢個拍擋梁英偉頂上做主席，即係現時立法會民建聯議員梁熙個老豆囉。但他上場後，港匯偏強產品又滯銷，愛美高股價又跌翻得九毫子，大劉又再從基金手上買回股份並重返愛美高。經此一役，奠定大劉股壇狙擊手呢個「朵」。事隔已經38年，但地產界人士仍記憶猶新。繼早前「細劉」成功在兩個月前私有化經營Sogo的利福國際後，大家可擔定櫈仔，緊盯一代股壇狙擊手之後著。
註：專欄作者的觀點不代表本網立場。
